कविता ( साखरपुडा )

स्पर्धेसाठी

विषय - साखरपुडा

आयुष्यातील गोड आठवण ,
सुखावून जातेय मनाला .
लग्नगाठ बांधायच्या आधी ,
समजून घेऊया एकमेकाला .

वाड:निश्चय आनंदी सोहळा ,
साखरपुडा असे पर्यायी नांव .
मनोमिलनाच्या सुंदर समयी ,
जमले सगेसोयरे अन् सारा गाव.

साखरसाडी शोभून दिसते ,
तेज वदनी नियोजित वधूच्या.
पाहून लकाकी वदनावरची ,
खुलते कळी अंतरी मुलाच्या .

तर्जनीतली अंगठी खुलते ,
दोघांच्याही साक्षीने आज .
भरजरी वसने शोभती अंगी ,
याचा तर वेगळाच असतो बाज.

स्वप्न सोनेरी उरात घेऊन ,
रंगणार मनी महाल सोनेरी .
नाही चालणार विसरून दोघे,
कष्टाचीच लागेल गोड भाकरी.

यादी करती जेष्ठ मंडळी,
देती एकमेका पानसुपारी .
साखरपुडा सुरवात आहे,
वैवाहिक जीवनाची पायरी.

कवयित्री
श्रीमती माणिक नागावे
कुरुंदवाड, जिल्हा. कोल्हापूर