कविता (साथ )

उपक्रम

चित्रकाव्य

साथ 

हातात हात घेऊन प्रेमाने,

युवा तरुण पुढेपुढे चालले.

कुंपण देते साक्ष प्रितीची,

रक्षण्या बाजू उभे ठाकले.

हिरवळ शोभे पायवाटेला,

जणू चालले बागेत जोडीने.

नीलवर्ण वसने अंगावरती,

सौंदर्य वाढले तिचे साडीने.

वारा अवखळ खोड काढतो,

केशसंभाराशी खुशाल खेळतो.

अलगद हलवून बाजूस सारतो,

कुंतल हलके गळ्यात माळतो.

साथ एकमेकांना देती,

नजर करती गप्पा प्रेमळ.

कणखर करांनी मृदुल करांचा,

दिले आश्वासन सोज्वळ.

पाऊल पडती मार्गक्रमण्या,

पोहचण्या यशोशिखरावरी.

साथ अखंडित एकमेकांची,

राहिल असेल जर जिद्द उरी.

कवयित्री

श्रीमती माणिक नागावे

कुरुंदवाड, जिल्हा. कोल्हापूर