कविता (जगण्याची चोरी झाली )

उपक्रम

विषय- जगण्याची चोरी झाली

शिर्षक- अस्तित्व

अस्तित्व टिकवून ठेवताना,

जगण्याची चोरी झाली.

नाती जुळवताना आता,

संशयाने गिरकी घेतली.

आली कुठुन ही महामारी,

विश्वास जगण्यावरचा उडाला.

अदृश्य शत्रूवर वार करताना,

शस्त्र कोणते?संभ्रम पडला.

बंद झाल्या भेटीगाठी,

भितीने पसरले पाय.

मरणानंतर सरणावरही

स्वकीय दूर लोटले जाय.

भिक्षा मागती जगण्यासाठी,

नाही उपाय हाती सापडला.

जगण्यावरचा प्रत्येकाचाच,

हक्क हिरावून कुणी नेला?

क्षणभंगुर झाले जीवन,

मृत्यू झालाय स्वस्त.

जीवनदान देण्यासाठी,

जीवरक्षक आहेत व्यस्त.

कवयित्री

श्रीमती माणिक नागावे

कुरुंदवाड, जिल्हा. कोल्हापूर