कविता ( अनाथांची दिवाळी )

स्पर्धेसाठी

करूणरस

विषय -अनाथांची दिवाळी

माय गेली बाप गेला ,
धरणीकंपाच्या माऱ्यात .
झाली पोरकी पोरेबाळे ,
जो तो आपल्याच तोऱ्यात .

कुणाकडे करायचा हट्ट ,
कोण आहे अनाथांचा वाली ?
नाही दसरा नाही दिवाळी ,
नशिबाची आबाळच झाली.

येता सण दिवाळीचा ,
जनता सारी हर्षित होते.
आमच्या आकांक्षाची मात्र,
आपसूकच होळी होते .

अनाथांची दिवाळी काय असणार  
लाचारीचं जगणच नशिबात.
अपेक्षित नजरेने पहायचं फक्त,
फराळ फक्त पहायचा स्वप्नात.

नको दैवा,जीणं अनाथांचं ,
भावनांचं दिवाळं निघायचं .
जड वाटतात पोटची पोरं ,
आम्ही तर उपऱ्यानेच जगायचं.

अनाथलयात मिळाला आसरा,
सहानुभूतीने समाधान मिळाले.
दातारांच्या दातृत्वाने खास ,
अनाथांच्या मनी सुख मिळाले.

कवयित्री
श्रीमती माणिक नागावे
कुरुंदवाड, जिल्हा. कोल्हापूर.